Thursday, 5 January 2017

大棋局:保人民幣關鍵之年(蘋果日報 Mr. Tregunter 2017.01.03)


2016年人民幣兌美元唔穿7算,外滙儲備唔跌穿3萬億美元,但市場已預期上述兩組數字今年都會穿。就喺除夕深夜,國家外滙管理局出文通告會加強個人換外滙審核。簡單嚟講,即係如發現內地個人換外滙時有奇奇怪怪、蠱蠱惑惑癥狀,會將其列為關注名單,可能會限制或禁止其換外滙。
內地走資最常用嘅一種手法係「對數」。如A公司要滙1,000萬人民幣出去,就同合作開嘅海外公司講掂數,入一批貨100萬人民幣,但篤數話批貨值1,000萬人民幣,然後申報換美金找數畀海外公司。海外公司收到錢後,抽部份做手續費,剩餘轉入A公司海外銀行戶口。
所謂合作開嘅海外公司,有時只係A公司分舵;而所謂入貨,有時只係同一批嘢重覆運出運入扮交收。呢啲就係奇奇怪怪嘅換外滙情況。個人換外滙手段唔同,銀碼較細,但原理一樣。個人換滙主要係針對做人頭,即某人可能有大筆錢想滙出去,但因個人每年只有5萬美元額度,所以搵人頭幫手換。

中國點解咁驚外滙流失?因為日本蕭條之教訓就係咁樣嚟。用一句話概括:資產在外負債在內,咁就大鑊。比如一間公司要幫政府起橋問銀行借10億元,將錢滙晒出去然後公司破產,條數就變咗銀行揹。如果個個都咁搞仲得掂?日本經濟迷失三十年,但自1991年以來,日本持有嘅外海資產從來都係世界第一。截至2015年末,日本持有海外淨資產339兆2,630億日圓。1990年日本土地價格不滅神話爆破前,有錢佬瘋狂將錢轉移出國。當一爆煲,錢已走,國內只剩下爛賬,係造成日本經濟一沉不起嘅最重要原因。
日本人民族性咁團結尚且如此,類似情況假如發生在中國會如何?一年前曾提及外管局儲備管理司司長殷勇調任央行行長助理值得注意,上星期一殷勇已升為央行副行長。外滙乃中國今年所有問題嘅重中之重。

Mr. Tregunter