Tuesday, 29 November 2016

大棋局:歐元風暴蠢蠢欲動(蘋果日報 Mr. Tregunter 2016.11.29)


今個12月要先留意歐元,尤其歐元佔美滙指數權重約60%,歐元之強弱,將左右大美元時代之威力。無論從技術走勢定期貨倉位盤路睇,歐元12月非常大機會爆邊出中期走勢。歐元兌美元由1.05至1.17區間已橫行近兩年,一直無方向。爆邊可以係爆上或爆落,愚以為爆落機會較大。
除早前提及今個星期日(12月4日)意大利有憲法改革公投外,奧地利亦將舉行第二輪總統選舉,極右派自由黨總統候選人霍弗(Norbert Hofer)講過可能推動奧地利脫歐公投。奧地利雖為議會制,權力在總理不在總統,但若霍弗當選有象徵意義,因為係二戰以嚟第一位極右派歐洲國家元首上台。總統爭權可以用解散政府等方法,而且奧地利係歐元區第七大經濟體,奧地利及意大利政局變動或打響弱歐元第一槍。

更頭痕嘅係嚟緊一年歐洲幾個大國都有選舉,而且右翼思潮步步進逼。首先3月英國可能正式脫歐,再加上3月荷蘭大選、4月法國大選、6月法國國會選舉、9月德國大選;右翼勢力最後能否當選係後話,就算當選係咪搞脫歐更後話,但每次借頭借路炒下特朗普現象同脫歐都好唔得閒,歐元成積弱之勢。
馬克思嘅經濟決定論受好多批評,例如索羅斯老師Karl Popper評其為宿命論。經濟決定論係指先有經濟形態,然後先有社會意識。如國家進入小康,啲人會要求民主;或經濟差,人民要求本地優先。

其實呢個就係哲學上拗咗幾千年嘅問題,係存在先於本質、定本質先於存在。係因為見到Angelina Jolie,所以先鍾意呢個人;定係本身個腦有一種傾向,見到Angelina Jolie後覺得好索?若真係信馬克思,就相信經濟形態先於社會形態。所以當見到一個國家出盡力打壓本土思潮,其實即反映上層判斷該國經濟真係唔掂。

Mr. Tregunter