Tuesday, 25 October 2016

大棋局:中國審判日(完)(蘋果日報 Mr. Tregunter 2016.10.25)


當預期一隻貨幣會貶值,點樣可以賺錢?其中一種方法就係借呢隻貨幣。走去借680蚊人民幣,兌換成100美元,倘若人民幣兌美元稍後跌至7,100美元可換回700蚊人民幣,還680蚊人民幣,20蚊人民幣落袋。為方便說明先撇除利率等因素。所以money market fund最鍾意搵中長期穩定貶值嘅貨幣,方便做carry trade,過去呢個角色係日圓。
大眾最關心嘅兩個問題,人民幣會急跌定慢跌,同埋會跌幾多。一次性貶值等同落閘放狗,外資被鎖死,外滙流失壓力大減,但外債沉重嘅企業好易一夜破產。慢慢貶值對企業衝擊力細,但大眾會爭先恐後換外滙,早換早享受、遲換蝕幾嚿,央行維持滙率秩序嘅成本大增。

按現時情況,中國恐怕會選擇後者。人民幣貶值預期已形成,改變唔到就惟有順住個勢諗辦法得到其他嘢,而呢樣嘢正正係中國夢寐以求:人民幣國際化。人民幣雖然被納入SDR權重,冇街外人用嘅話有名無實。貶值預期可以吸引人借貸以人民幣計價,亞投行就有得發揮。
至於跌幾多,英鎊由07年高位至今貶值40%,日圓由11年高位貶值至今亦30%。跌10%以內唔叫貶值,只係調整。真係要貶值化解資產泡沫壓力就係20%以上。想各國收人民幣做儲備要畀折頭,新股IPO前都要低價批股畀大孖沙,大孖沙見有水位先會大手入貨。

G20後各國協議滙率保持穩定,卻好似鴻溝和約,當協議好楚河漢界,張良立即向劉邦進言:「取天下就在呢一次背信。」尋常人要講信用,但國與國之間嘅政治協議,不宜太純情。亞洲多國貨幣已蓄勢待貶,只要人民幣一帶頭貶值,其他國就會跟,抵銷人民幣貶值效力。嚟緊我哋首先會見到中國遊客大量消失,就如九十年代後日本遊客消失一樣。用透支未來借嚟嘅繁榮,係時候要還。

Mr. Tregunter