Tuesday, 20 September 2016

大棋局:日本人造風暴來襲(蘋果日報 Mr. Tregunter 2016.09.20)


日本正準備一次神風特攻式貨幣政策改革,最快9月21日公佈,若事情落實,將出現人造風暴。日本央行籌謀將日本國債孳息曲線夾硬拗上,先講結論,咁樣做會令長債價格大跌及孳息大升,繼而輻射影響股票等市場。上星期消息傳出後,iShares J.P. Morgan新興市場美元債券ETF單日淨沽貨量創歷史新高。
過去提及日本現行貨幣政策嘅壽命只剩下兩年,日本央行揸住38%日本國債,兩年內會揸到50%;日本央行亦揸住60%日本ETF,ETF資金池規模冇變的話,一年內會被日本央行買乾。現行貨幣政策係一條堀頭路,要做就做框架以外嘅嘢,而且必須其疾如風、侵掠如火先有效果,否則市場轉頭又會覺得你冇料到。

外媒報道日本正籌謀一次貨幣政策大手術,就係央行主動買入短債,唔買長債不特止,重要沽長債。即將美國嘅operation twist調轉做。揸短債,孳息曲線前端會壓落去,影響短期拆息下跌;唔買長債,孳息曲線末端會拗上;更甚者可能沽長債。今年7月,日本20年國債孳息最低曾見負0.005%,見底後持續向上,上星期三最高見0.497%。
日本點解要咁樣做?除咗因現行貨幣政策窮途末路外,恐怕另一個原因係要打擊日圓炒家。上半年有一個怪現象,就係日本國債已經負利率,但仍然不斷有人追住買。其中兩大資金來源,一個係全球各大債券基金,另一個係中國資金。
日本國債負利率,日圓又係負利率,再加埋日圓兌美元掉期有水位,具體日後有機會再談,簡單嚟講砌成一個瞓喺度套戥賺價差嘅組合。我哋表面見人貼錢買國債,但醒目錢搵到窿路賺錢。今年頭七個月走去買日本證券同債券嘅中國資金達到8.93萬億日圓,超過去年全年5.68萬億日圓。債息反轉上述套戥方法就唔掂,若日本真係夠薑咁大動作,股市不樂觀。

Mr. Tregunter