Tuesday, 2 August 2016

大棋局:日圓賭命式實驗(完)(蘋果日報 Mr. Tregunter 2016.08.02)


日本現行貨幣政策嘅壽命只剩下兩年。日本央行揸住320萬億元(日圓.下同)日本國債,佔市場38%。日本財務省每年發新債30萬億元,而QQE買債規模80萬億元。即係唔使兩年日本央行自己會揸住50%日本國債。
日本ETF市場規模約16萬億元,日本央行又揸住60%。今次擴大ETF購買規模到6萬億元,ETF資金池規模冇變的話,1年內已經玩完。所以黑田東彥今次只係求其交下貨,佢仲想等吓。
自今年初開始,日本央行一出招,日圓就升、日經就插,因為市場睇死日本央行走入一條堀頭路,每出一次招就越接近盡頭。嚟緊只有兩個結果:安倍經濟學失敗,或黑田東彥最終配合/被撤換。要突破惟有做框架以外嘅事。做框架以外嘅事唔一定成功,但繼續做現行之事則死路一條。黑田東彥今年初曾謂,貨幣政策可能已經失效。貨幣政策嘅傳導性一般要半年到一年先影響到實體經濟,黑田東彥今次嘅表現反映佢仍寄望年初推出之負利率有效,咁就唔使局住出大招。

QE同直升機撒錢分別在於,QE喺二級市場買債,直升機撒錢則喺一級市場直接買。現時《日本公共財政法第五條》禁止日本央行直接買任何政府債券。不過呢條例有個缺口,就係「特殊情況下」,只要國會同意日本央行就可以咁做。乜嘢係特殊情況?可能係打仗,可能係天災,冇人知,冇寫明就代表睇時勢,有得拗。
除央行直接買債外,仲有發行永續債、零息債等方法。西方經濟學家好多諗頭,但通常自己唔做,走去拍人膊頭:「試吓啦。」二十世紀初日本仍處於舊制度扭轉去新制度嘅改革期,故有「有前冇後,打死罷就」之意志。跳出現行貨幣政策框架而為,乃經國之大事。井上準之助同高橋是清兩任財相嘅下場歷歷在目,拿捏得唔好,後果無法想像。安倍晉三有呢個膽,但黑田東彥未有呢個覺悟。

Mr. Tregunter