Tuesday, 19 July 2016

大棋局: 日圓賭命式實驗(一)(蘋果日報 Mr. Tregunter 2016.07.19)


日本復行二戰前嘅一次貨幣政策實驗之說甚囂塵上。日圓兌美元升至100關口時急貶回至105,全世界眼定定睇安倍晉三今個月係咪會出大招令日圓貶值。
所謂「直升機撒錢」由佛利民提出,用嚟對付通縮。聯儲局前主席伯南克實行量寬(QE),令美國不至陷入大蕭條,因而有「Helicopter Ben」之稱。但日本實行QE已久,仍然未有起色,仲可以點搞?其實早在二戰前,日本便實行過比QE更激嘅貨幣政策,而且數據顯示有效。
日本明治維新後仍然係一個好窮嘅國家,直到第一次世界大戰,歐洲對軍用物資需求大增,日本發咗一次戰爭財。由嗰刻開始,日本就由入超國扭轉為出超國。但生產線擴充得太快,大戰打完歐洲需求急跌,大量做廠、做出口嘅人又霎時間冇嘢做,日本陷入嚴重經濟衰退。
更唔好彩嘅係1923年發生關東大地震,政府同銀行赤字大增。各種問題一直累積到1927年,終於引爆昭和金融恐慌,全國大量銀行擠提破產。呢個時候日本財相井上準之助上台,而佢救市嘅方法,竟然係製造通縮。
井上準之助當時認為日本需要通縮,因為發戰爭財生產線擴充得太急,打完仗大量企業靠政府援助半生不死,係經濟蕭條主因,所以要通縮,嚟一次大淘汰,將做唔住嘅企業篩走。於是佢解除黃金出口禁令,要恢復金本位。恢復金本位意味貨幣流通量會減少,銀紙購買力增加,物價就會跌。
讀者眼利的話應立即察覺,二十年代末正正係歐美大蕭條時期。全世界經濟大蕭條時,日本再自製通縮踩多腳,結果當然係全家慘。終於喺1932年,井上準之助雖已落台但仍被暗殺。接任嘅係日本QE之父高橋是清,本欄讀者應對呢個名唔陌生,當所有經濟學家仍然坐喺房內拗要點對付通縮時,高橋是清以賭命嘅方法做一次貨幣政策實驗,係最早期的直升機撒錢。當時高橋是清出咗咩大招?下期再談。

Mr. Tregunter