Tuesday, 24 May 2016

大棋局:美國準備貨幣突擊(蘋果日報 Mr. Tregunter 2016.05.24)


某權威人士:「兜口兜面同你講人民幣冇得貶值,咁易畀你班蛋散估到,仲係共產黨嚟嘅?」一臉忌廉蛋糕嘅澳洲籍肥仔律師聽罷口中念念有詞:「真係估你唔到喎,共產黨好嘢!共產黨好嘢!」
其實各國央行好多時都需要你估佢唔到,任何事不斷做,邊際效用必然遞減乃至無效,貨幣政策亦一樣。央行玩貨幣政策有時需要攻其無備,出奇不意,咁先有效果。所以聯儲局前主席格林斯潘有句名言:「如果你以為好了解我,你一定係誤解咗我嘅說話。」

9月前加息機會大

聯儲局好似CD跳線咁不斷重複利率就快加、好快加、即將加,講到大眾厭倦兼麻木,覺得耶倫三藏出嚟演講都係唱《Only You》,冇料到。但最近美國嘅動作顯示6月至9月期間,非常大機會起碼加一次息突擊市場。
首先,上個月美國財政部將中國、日本、德國、韓國、台灣列為滙率觀察名單,警告唔好將自國貨幣大貶頂爛市。然後5月21日G7峰會期間,美國財政部長Jack Lew再次警告日圓唔好搞競爭性貶值。
貨幣之強弱、滙率之平貴係相對性,如果除美國外全世界貨幣一齊再貶值,縱然美國冇動作,對美國而言雖無加息之名也有加息之實。但美國經濟今次復蘇同過去唔同,非常緩慢,而且唔覺意就好易轉變成停滯性通脹,所以美國要嘅係慢慢加息,逐啲逐啲嚟。

當其他國家貨幣貶值而美國加息,美元同其他國家貨幣之利差擴大,就變成美國加少少息都好似大幅加息嘅效果。近月美國不斷出口又出手警告各國唔好頂爛市,其實即反映美國要hold住個場,為加息做準備,而且係即將要做。另一方面,對照近期中國嘅動作,可以見到中美之間有種默契。中國係現時美債最大持份者,喺美國加息進程上,若兩國有乜講唔掂數,中國大手沽美債就會變相幫美國大幅加息。所以點解過去聯儲局喺加息問題上從來唔會理其他國家,近年卻反反覆覆地喺官方議息聲明中提及中國因素。
據《華爾街日報》報道,中國可能最快於7月建立一個平台,畀中資及外資喺中國境內發行SDR計價債券。人民幣最大問題係,內地稍為有錢嘅人都想帶埋錢移民出國。要將大筆錢送出國,其中一個做法係搞海外併購。2015年中國海外併購金額410億美元,但2016年頭3個月,據彭博統計,內地宣佈海外併購交易額已達到創紀錄的970億美元。
由於SDR由美元、歐元、人民幣、日圓、英鎊五大權重貨幣構成,其中人民幣只佔10.9%。即係話,買SDR債券等同揸住近九成外滙,希望用咁嘅方法留住國內資金唔好一面叫愛國一面爭住奪門而出,尤其係叫共產黨好嘢叫得最大聲嗰班。

Mr. Tregunter